प्रतीक्षा पर दोहे

तिय पिय सेज बिछाइयों, रही बाट पिय हेरि।

खेत बुवाई किसान ज्यों, रहै मेघ अवसेरि॥

अंषड़ियाँ झाँई पड़ी, पंथ निहारि-निहारि।

जीभड़ियाँ छाला पड्या, राम पुकारि-पुकारि॥

जब-जब वै सुधि कीजियै, तब-तब सब सुधि जाँहि।

आँखिनु आँखि लगी रहैं, आँखें लागति नाहि॥

रे हितियारे अधरमी, तू न आवत लाल।

जोबन अजुंरी नीर सम, छिन घट जात जमाल॥

नभ लाली चाली निसा, चटकाली धुनि कीन।

रति पाली, आली, अनंत, आए बनमाली न॥

प्रियतम को पोख्यो चहैं, प्रेम-पियासे नैन।

आँसु निगोरे चहत हैं, औसर पै दुख दैन॥

पीपा पी पथ निरखता, आँखा झाँई पड़ी।

अभी पी अडग अलख लखूँ, अडिकूं घड़ी-घड़ी॥

कुंजा ज्यों कुरल्या करै, बिरही जणा को जीव।

पेपा आगि न बुझ सके, जब लग मिले न पीव॥

कहति ललन आए न क्यौं, ज्यौं-ज्यौं राति सिराति।

त्यौं-त्यौं वदन सरोज पैं, परी पियरई जाति॥

जिन कजरारे नैन ने, कजरारो मुख कीन।

तिनपै बेगि सिधाइये, मोहन! परम प्रवीन॥

ये समीर तिहुँ लोक के, तुम हौ जीवन दानि।

पिय के हिय में लागि के, कब लगिहौ हिय आनि॥

पीउ न आयौ सो वनहिं, रह्यौ कहूँ रस पागि।

कहत न काहू लाज सों, रही सोच मग लागि॥

जमुना तीर, समीर तहँ, बहै त्रिबिधि सुख होय।

अजौं न आयौ क्यौं न पिय, करैं दोर द्रग दोय॥

अजौं अली आयौ न पिउ, कहा हेत सु कहै न।

अध विकास नैननि रही, आधे कहि मुख बैन॥

पीउ न आयौ क्यौं न यह, कहो हेत अब सोय।

नैन बेग चाहत मिल्यौ, सखी ध्यान मग होय॥

पिउ हउं थक्किय सयलु दिणु तुह विरहरग्गि किलंत।

थोडइ जलि जिम मच्छलिय तल्लोविल्लि करंत॥