सत्संग पर दोहे

भजन भलो भगवान को, और भजन सब धंध।

तन सरवर मन हँस है, केसो पूरन चँद॥

माला टोपी भेष नहीं, नहीं सोना शृंगार।

सदा भाव सतसंग है, जो कोई गहे करार॥

संत मुक्त के पौरिया, तिनसौं करिये प्यार।

कूंची उनकै हाथ है, सुन्दर खोलहिं द्वार॥

जे जन हरि सुमिरन बिमुख, तासूँ मुखहुँ न बोल।

राम रूप में जे पगे, तासूँ अंतर खोल॥

साध संग जग में बड़ो, जो करि जानै कोय।

आधो छिन सतसंग को, कलमष डारे खोय॥

जन सुन्दर सतसंग मैं, नीचहु होत उतंग।

परै क्षुद्र जल गंग मैं, उंहै होत पुनि गंग॥

सुन्दर या सतसंग की, महिमा कहिये कौन।

लोहा पारस कौं छुवै, कनक होत है रौन॥

संत समागम कीजिये, तजिये और उपाइ।

सुन्दर बहुते ऊबरे, संत संगति मैं आइ॥

दारिद सुरतरु ताप ससि, हरै सुरसरी पाप।

साधु समागम तिहु हरे, पाप दीनता ताप॥

पाँच क्लेश ब्यापै नहीं, चित न होय विक्षेप।

जो जगमग सतसंग मिले, तन मन सन निर्लेप॥

लोक प्रलोक सबै मिलै, देव इंद्र हू होइ।

सुन्दर दुर्लभ संतजन, क्यों कर पावै कोइ॥

मात पिता सबही मिलै, भइया बंधु प्रसंग।

सुन्दर सुत दारा मिलै, दुर्लभ है सतसंग॥

परसुराम सतसंग सुख, और सकल दुख जान।

निर्वैरी निरमल सदा, सुमिरन सील पिछान॥

सुन्दर जौ हरि मिलन की, तौ करिये सतसंग।

बिना परिश्रम पाइये, अविगति देव अभंग॥

जन सुन्दर सतसंग तें, उपजै निर्मल बुद्धि।

जांनै सकल बिबेक करि, जीव ब्रह्म की सुद्धि॥

सुन्दर या सतसंग मैं, शब्दन को औगाह।

गोष्टि ज्ञान सदा चलै, जैसै नदी प्रवाह॥

सुन्दर सब कछु मिलत है, समये-समये आइ।

दुर्लभ या संसार मैं, संत समागम थाइ॥

यह लक्षण अनुराग के, अनुरागी उर जान।

ताको करि सतसंग पुनि, अपनेहुँ उर आन॥

राज साज सब होत है, मन बंछित हू खाइ।

सुन्दर दुर्लभ संतजन, बड़े भाग तें पाइ॥

साध-साध सब कोउ कहै, दुरलभ साधू सेव।

जब संगति ह्वै साध की तब पावै सब भेव॥

सुन्दर या सतसंग मैं, भेदर भेद न कोइ।

जोई बैठेै नाव मैं, सो पारंगत होइ॥

जो आवै सतसंग मैं, ताकौ कारय होइ।

सुन्दर सहजै भ्रम मिटै, संसय रहै न कोई॥

सुन्दर जो सतसंग मैं, बैठै आइ बराक।

सीतल और सुगंध ह्वै, चन्दन की ढिंग ढाक॥

राग द्वेष तें रहित हैं, रहित मान अपमान।

सुन्दर ऐसेै संतजन, सिरजे श्री भगवान॥

सेवा अरु तीरथ-भ्रमन, फलतेहि कालहि पाइ।

भक्तन-संग छिन एक में, परमभक्ति उपजाइ॥

संतनि ही तें पाइये, राम मिलन कौ घाट।

सहजैं ही खुलि जात है, सुन्दर हृदय कपाट॥

जन सुन्दर सतसंग तें, पावै दुर्लभ योग।

आतम परमातम मिले, दूरि होंहि सब रोग॥

जन सुन्दर सतसंग तें, उपजै अद्वय ज्ञान।

मुक्ति होय संसय मिटै, पावै पद निर्बान॥