सकल तू बल-छल छाँड़ि, मुग्ध सेवै मुरलीधर।

मिटहिं सहा भव-द्वंद फंद, कटि रटि राधावर॥

वत्सलता अरु अभय सदा, आरत-अघ-सोखन।

दीनबंधु सुखसिंधु सकल, सुख दै दुख-मोचन॥

अखिल लोक के जीव हैं, जु तिन को जीवन जल।

सकल सिद्धि अरु रिद्धि जानि, जीवन जु भक्ति-फल॥

प्रगट वंदन रसना जु प्रगट, अरु प्रगट नाम रढ़ि।

जीभ निसेनी मुक्ति तिहि बल, आरोहि मृढ़ चढ़ि॥

और धर्म अरु कर्म करत, भव-भटक न मिटिहै।

जुगम-महाशृंखला जु, हरि-भजनन कटिहै॥

‘चत्रभुज' मुरलीधर-कृपा परै पार, हरि-भजन-बल।

छीपा, चमार, ताँती, तुरक, जगमगात जाने सकल॥

ऊँच नीच पद चहत ताहि, कामिक कर्म करिहै।

कबहुँ होइ सुरराज कबहुँ, तिर्यक-तनु धरिहै॥