गिरिजा वामहि अंग, अहाँ शशिकलहुँ उपर चढ़

की न बनलि छी प्रिया जगत्पति पतिक अधिक बढ़ि?

अहींक नीरबल नारायण-पद-नीरज पावन

करथि अहिंक सञ्चय हित विधिहु कमण्डलु धारण

अहँ त्रिदेव-सहचारिणी त्रिपथ-वाहिनी त्रिदश-धुनि

त्रिविध ताप संहार हित होउ सदय जन पर जननि॥1॥

अहँ हिम-नगपति महाकविक उर-द्रवित निरन्तर

नित नव-नव हिम-भाव-सजल कविता चिर-सुन्दर

ध्वनि-रस-गतिमय एक-एक पद-कणसँ सुरसरि

युग-युगसँ छी दैत अमृत सन्देश विश्व भरि

छाया-पथक विहारिणी गति रहस्य निधि गामिनी

करब भाव उर्वर हमर, उर-मरु शीतल वाहिनी॥2॥

शिव की सकितथि विष पचाय यदि लितथि न माथे

जैतथि सिन्धु सुखाय वाडवानलहिक हाथे

की न ठिठुरि हिमवान मरण-शय्यागत रहितथि

यदि न अमर-धुनि! अहँक अमृत-रस भाग्ये पबितथि

शत शत ज्वालामुखी-मुख जरि जैतथि भू दग्ध भय

जँ न जुड़बितनि सुधामयि! अहँक सुधाधिक विमल पय॥3॥

जन्म-जन्म सञ्चित हिमवन्तक पुण्यक लेखा

भारत-भूमिक भाल बीच भाग्यक शुभ रेखा

कयल जलधिके रत्नाकर दय जीवन-धारा

भूतलके कयलहुँ स्वर्गहुसँ बढ़ि शुचि सारा

तीर्थराज-लक्ष्मी अही, काशी शीतल-कारिणी।

जनकभूमि-रज-कणक हित जय मिथिला-सहचारिणी॥4॥

सगर सगर-सुत सुतल महानिद्रा–मुद्रित गुनि

जननि! जगाओल मुक्ति-प्रभातक अरुण किरण बनि

पाप-कुमुद-कुल भगीरथक दलनि, पुण्य-पंकज-विकासिका

भगीरथी तप-गगन-भानु-रश्मिक प्रकाशिका

हमर हृदय-कुहकर निबिड़ अछि अभेद्य मोहक अमा।

करुणा-किरणक एक कण दय, प्रकाशमय करब मा॥5॥

पाप-रात्रि निःशेष-कारिणी अही प्रभाती

कलिक कलुषमय गुफा-तिमिर प्रति दीपक बाती

जन्म-निधन-नक्षत्र अस्त हित दिनमणि दीपित

यमभय-करिदल-दलन हेतु मृगपति उद्दीपित

जनिक जलक कणसँ अघक शत-शत सेतुक भञ्जना।

कत सम्भव मूकक मुखे तनिक शक्ति-अभिवन्दना॥6॥

यदि न हमर हो भाग्य जीव जे जल-सञ्चारी

अथवा तट तरु पत्र खसय टुटि अन्तहु वारी

यदि नहि सम्भव होय तृणक तनु सलिल-विलासी

अथवा स्नातक केश लुलित भय स्रोतक वासी

ओहि पथक हम रेणु-कण बनी, जाहि पथ पथिक जन

जाथि, तनिक पद लागि कहुँ, जाय मिली तट बालु-कन॥7॥

नहि कस्तूरी-तिलक भाल गंगौट लभ्य जत

स्वर्णक कण अछि तुच्छ बालु-कण हो यदि उपगत

अमृत-कलश ओंघड़ाय देब गंगाम्बु चुलुक भरि

पंक अंग यदि संग, न चन्दन लेपब उपकरि

गंगा-स्रोतक छाड़निक यदि हो सम्प्रति बिन्दु भरि।

चित न चढ़त कथमपि हमर क्षीरक सम्भृत सिन्धु धरि॥8॥

कण्टकमय तट-बास हेतु प्रासादहु तेजब

छोड़ि अरगजा-लेपन गंगा-पाँक अङेजब

नहि व्यवसायी पोत सागरक वक्ष-विहारी

काठ बनब अछि इष्ट जाह्नवी-जल-सञ्चारी

नहि कुंकुम कश्मीरजा युवति-कपोल-पराग रुचि।

अंग-बंग-मगधक पशुक खुर-रज बनि लहि स्रोत शुचि॥9॥

स्वर्ग-अर्गला तोड़ि गिरिक रोधन नहि मानल

शिव-शिर वासक लोभ-लेश मनमे नहि आनल

शत-शत प्रान्तर पार, सहस कोशक कय धावन

अन्त क्लान्त मिलि, क्षार-वारि कयलहुँ भव पावन

शतमुख विनिपातक कथा कहौ, न खेदक लेश अछि।

जगत-जीव-हित-साधना एक मात्र उद्देश्य अछि॥10॥

द्विज-अन्त्यजके एक घाट जल अहाँ पिऔलहुँ

दलित-दलहुँके पानि परसि, हरि-पद पहुँचौलहुँ

स्वर्ग-मन्दिरक रुद्ध अर्गला खोलि सहज मति

अघी, अन्त्यजक सुलभ कयल जननी दर्शन-गति

अहँ सुधारिका धरणिमे प्रथम-प्रथम अयलहुँ जखन।

यम-समाजमे गेल मचि रिक्त-रक्त हलचल तखन॥11॥

गिरिक शिखरसँ सागर धरि एकहि प्रवाहसँ

मुक्तिसाम्य सन्देश देल स्वच्छन्द नादसँ

स्वर्ग-राज्यमे, भेद न राखल नृपति-रंकमे,

भक्तिक श्रममे, ज्ञानक पूजी-पतिक अंकमे

मुक्ति-तन्त्र जन-सुगम कय, दण्डधरक बल लय निखिल।

कान्तिकारिणी! कयल अहँ भव-वन्दी-बन्धन शिथिल॥12॥

परम पुरातन, भगीरथक श्रमसँ सञ्चालित

विश्व-अविद्या हरण हेतु हरि-पद उद्घाटित

जत निर्वाध प्रवेश जलक कण-कण अध्यापक

नर नारी शिशु युवा जीर्ण पल भरिमे स्नातक

युग-युगसँ जत आर्यजन तत्व चयन कयलनि परम।

करथु अविद्या दूर से विश्वक विद्यालय चरम॥13॥

आदिकविक नहि छन्द, कालिदासक ध्वनि-बन्ध न,

द्रविड़-शिशुक नहि कण्ठ, जगन्नाथक न निबन्धन,

विद्यापतिक न स्वर, न लभ्य पद्माकर सौरभ

जननि! सुनाओत कोना मुग्धं सुत विनय हतप्रभ?

किन्तु विदित विश्वास ई जननी हृदयाऽऽवर्जना।

जड़सुत-क्रन्दन सुनि यथा, तथा न चतुरक कल्पना॥14॥