आमिल पीबैत कहलनि ओ छोडू हमरा परतारू नै
बज्जर भऽ गेल मोनक धरती चासेविना समारू नै
ओना तँ हमहीँ जनकदुलारी, हमहीँ रामपियारी छी
तहूसँ बढ़िकऽ लवकुशसन बङ्का-वीरक महतारी छी
प्रेम-सृजन-शक्ति कहबैतो असलमे अबला नारी छी
तहीसँ जीवन-ओलतीमे टपटप चूबैत एकचारी छी
छोडू कहुना चोखाएल घाओक खैँठी एना ओदारू नै
बज्जर भऽ गेल मोनक धरती, चासेविना समारू नै
त्रेता युगके सीता छी आ द्वापरके द्रौपदी छी हम
तीरभुक्तिमे बहैत सभटा निज नोरहिके नदी छी हम
कोमल-प्रेमिल-हृदयवासिनी युगयुगन्तसँ यदि छी हम
आइ चेतनासँ परिपूरित नव एक्कइसम सदी छी हम
दर्दक दस्तावेज लिफाफा, विनु तैयारी फारू नै
बज्जर भऽ गेल मोनक धरती, चासेविना समारू नै
नारी-मानक विन पुरखारथ, तकरा आब फजूल बुझू
सदिखन आगू बढ़बालए पगपग दुन्नूक समतूल बुझू
सहयात्राकेँ दुनिया भरिकेर खुशी आ सुखक मूल बुझू
तखनहि जीवनके बगियामे महमह गमकत फूल बुझू
विनु जुटियौने प्रेमक खुहरी झुट्ठे आँच पजारू नै
बज्जर भऽ गेल मोनक धरती, चासेविना समारू नै
- पुस्तक : ई-मिथिला
- संपादक : बालमुकुन्द
- रचनाकार : धीरेन्द्र प्रेमर्षि
- संस्करण : 2025
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
