द्वैत-गीत
भरि दी स्वर अहाँ, हम तँ मात्र व्यञ्जना।
रेख-लेख हमर, अहिँक कला रञ्जना॥
चरण हमर, गति अहाँक
शब्द सहज, अर्थ बाँक
पद-वितान हमर, अहँक छन्द-बन्धना।
शक्ति अहँक, भुजा हमर
भक्ति हमर, धुजा अहँक
प्रतिमाक प्राण अहँक, हमर वन्दना।
तरुक उगब मात्र कर्म
फड़ब-फुलब ऋतुक धर्म
वन-उपवन रस जगैब मधुक योजना
भूतल के तपन ताप
हृदय रसक बनब भाफ
उमड़-घुमड़ बरिसब ई घनक घोषणा।
भरि दी स्वर अहाँ, हम तँ मात्र व्यञ्जना॥
स्रोत :
- पुस्तक : रचना संचयन (पृष्ठ 54)
- संपादक : चन्द्रनाथ मिश्र ‘अमर’/ शंकरदेव झा
- रचनाकार : सुरेन्द्र झा ‘सुमन’
- प्रकाशन : साहित्य अकादेमी
- संस्करण : 2012
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
