आ से एहेन अहिबाती के हेती

जे बभनगमाबाली भौजीक सोहाग-भाग देखि जरि नहि जेती

ओना मानलहुँ

जे हुनका पोथी-पतराक दर्शन नहि भेलनि

मानलहुँ जे पाबनि-तिहारे हुनका तेल-कूड़ भेटलनि

मानलहुँ जे चाभीक गुच्छा

ओ कहियो अपन आँचरमे नहि बान्हि सकलीह

इहो मानलहुँ जे लाख कबुलाक बादो

आजीवन ओ दोसर पुत्र-रत्न प्राप्त नहि कऽ सकलीह

मुदा निस्सन्देह

एक टा भरल-पूरल जीवनकेँ छाँटैत-फटकैत

अपन 37 बरखक बयसमे ओ

38289 टा सोहारी पकेलीह

2173 डेगची भात पसेलीह

13000 बेर बर्त्तन-बासन माँजलीह

307 बेर आँगन निपलीह

47 टा साड़ी आ 92 टा ब्लाउज पहिरलीह

275 राति भूखल सुतलीह

हुनका 3 बेर भेटलनि सम्भोगक सुख आ 949 बेर भेलनि बलात्कार

बेटी जनमौलनि 4 टा आ 5 बेर

भेलनि गर्भपात

मुदा ई देखू सभसँ मार्मिक बात

जे ठीक बरसातिक प्रात

जखन हुनक सीथ रहनि सिनूरसँ कहकह करैत

आ भरल रहनि लहठीसँ हाथ—

तखन अपन स्वामीक आगू

बिना अन्न-जल ग्रहण कयने ओ भऽ गेली विदा