जनिक चरण-नख-ज्योति तिमिर-तति उर-उर हरइत

नूपूर-सिञ्जित सञ्चित कयनहि वीणा मुखरित

पद-पल्लवक पराग सती-शिर-सिन्दूर-श्री

चरण-चिह्न बनि भाग्य-रेख मिथिलाक उदित की?

मैथिलीक पद-अंगुलिक विभा उदित भय कविक उर।

अरुण-करुण रस-रश्मिसँ हरओ लोक-व्यापित तिमिर॥1॥

जनक जनिक अन्वर्थ सदर्थक जन्म-भूमि ई

जानकीक जन्मे जनमे अभिधाक जीत ई

सीता खेतक स्वयं लक्षणा लक्षित रहितहुँ

मैथिलि! मिथिला-वाणीमे रुचि व्यञ्जित करितहुँ

रहितहुँ विश्व-विभूति अहँ, तिरहुति-माटिक मूर्ति छी।

रस-रसना सम मैथिली, मिथिला-मानक पूर्ति छी॥2॥

चक्रवर्ति दशरथक कुलक अहँ दीप-शिखा बनि

कयलहुँ ज्योतिर्मय अवधक नभ चन्द्र-कला धनि

सरयू जलमे घोरि चरण-रज मधुर बनौलहुँ

कोशलेशकेर भुजा-वासिनी शक्ति कहौलहुँ

भोग वयस वन-वासिनी बनि, योगक पथ अहँ धेलहुँ।

नहि जीवन भरि बिसरलहुँ जे विदेह-पुत्री थिकहुँ॥3॥

धनुर्भङ्गहिक समय अंग अहँ रामक वामा

बनि चललहुँ जे छोड़ि सती-कुल-रत्न ललामा

रहू बनल युग-युग धरि रविकुल-दिवस-कमलिनी

सुरभि विश्व भरि पसरि रहल अद्यावधि जननी

फिरलहुँ नहि दुर्दैवश जनकक जनपद जन्म भरि।

किन्तु नैहरक स्वर अहाँ बिसरल छी नहि आइ धरि॥4॥

धनुष-यज्ञ सर्वस्व-दक्षिणा जनकक जारी

दाशरथिक रथ भरल स्वर्ण यौतुकसँ भारी

बिदा काल दय रत्न-राशि कोशलक कोषमे

हृदय रिक्त जल-सिक्त जुटल छथि वरक तोषमे

अपना खो छिक अन्न-कण, पोछि नयनसँ अश्रु-कण

खसा देलहुँ नैहरक दिस, सजल शस्य-श्यामल कत न॥5॥

जे छाया हिमवत-वनमे, रस कमला जलमे

डाली भरलहुँ लोढ़ि फूल-फल जे फुलहरमे

द्वारि लटकि शुक पाठ कयल, कोकिल कूजल छल

सखी संग सम्भाषणमे जे स्नेह स्वर भरल

कहू मैथिली! की कतहु भेटल स्व-रस प्रवासमे?

अवध-पुरी रनिवासमे, पञ्चवटी वन-वासमे?6॥

यज्ञवाट ई बाट अहँक कहियासँ ताकथि

ऋतु-ऋतु वन-वन फूल-पात लय माला गाँथथि

जल भरि कमला ठादि कखनसँ घरक कातमे

कुशल पुछै छथि सखी वाग्वती बात-बातमे

तारक पंखी पाँतरक, कर झारी चर-चाँचरक।

मैथिलि! उत्सुक अवनि छथि भरल अन्नसँ आँचरक॥7॥

नीति-निरत राजा देखल निज अवध-प्रजा मति

अनल-शुद्ध संगिनी मैथिलिक लिखल वनक गति

किन्तु करुण परिपाक आश्रमक बनि शुचि कविता

तमसा-तीरक कवि-आङन मे रस उर्वरिता

वन-वासिनि! एकाकिनी, दूरहु पति-उर वासिनी।

करुण अश्रु-कणसँ अहिँक रामायण रस प्लाविनी॥8॥

पतिक बात नहि राखि, पिता-घर सती जरलि छथि

उतरि शिवक शिरसँ गङ्गा समुचिते गललि छथि

माधव संग न जाय राधिका विरह-बरलि छथि

काली हर-उर चरण राखि, जी दाबि दगलि छथि

किऐ बनल वन-वासिनी पति-पद रेणु सुता हमर?

ज्वालामुखी न थीक ई, ज्वलित प्रश्न धरणीक उर॥9॥

मेध-यज्ञमे अवध मध्य बनि स्वर्णक प्रतिमा

भेलहुँ प्रतिष्ठित-प्राण अहाँ हे! रामक वामा

मन्दिर-मन्दिर समय-समय भारत भरि चर्चा

किन्तु एतहि टा प्राण-प्राणमे होइछ अर्चा

युग-युगसँ मिथिलाक अहँ रोम-रोम रमि गेल छी।

मैथिलीक रूपे अहाँ की न कण्ठ बसि गेल छी?10॥