पतिया लिखि हो देतू
patiya likhi ho detu
सुनि लेतू सखिया, हमरी मनवा के बतिया,
पतिया लिखि हो देतू।
सजना के तूहीं समुझाइ,
पतिया लिखि हो देतू॥...
साहेब के सलाम लिखिहऽ।
नीचे हमार नाम लिखिहऽ॥
बिचवा में लिखिहऽ हमरी,
मनवाँ के बतिया॥ पतिया...
चढ़ते सावन सैंया घरे चलि आईं।
बाटे हमार किरिया देर जनि लगाईं॥
रुपिया ना पइसा चाहीं,
ना कवनो सौगतिया॥ पतिया...
हमरो नयनवां बरिसे जइसे सवनवां।
काहे चोराइ लिहलऽ हमरो चयनवां॥
दिनवां बीतेला कइसो,
कटे नाही रतिया॥ पतिया...
चिटिया लिखाईं हम अँसुआ गिराइके।
सुधियो ना लेनी परदेसवा में जाइके॥
कवन सवतिया मरलसि,
राउर बा मतिया॥ पतिया...
स्रोत :
- पुस्तक : गँउवा के माटी अनमोल (पृष्ठ 56)
- रचनाकार : रामबहादुर ‘अधीर पिण्डवी’
- प्रकाशन : अखिल भारतीय भोजपुरी समाज, गोमतीनगर, लखनऊ
- संस्करण : 2010
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
