बदनाम कइसे होई
badnam kaise hoi
बगिया बबुरी लगइब तऽ आम कइसे होई।
साथ सन्तन के कबो बदनाम कइसे होई॥
माई-बाप के उपकार जे भुलाई।
नरको में कतहूं सरन नाही पाई॥
बिनु सेवा के इनकी चारो धाम कइसे होई॥
बगिया बबुरी लगइबऽ...
जवनी सुरतिया पर नीयति खराब बा।
मनवा के तोहरी खूलत किताब बा॥
धागा राखी के कबो बदनाम कइसे होई॥
बगिया बबुरी लगइबऽ...
जइसन करबऽ तू कीरति कमाई।
जग के लोगवा तोहार गुन गाई॥
हीरा मटिया में रहि बेदाम कइसे होई।
बगिया बबुरी लगइबऽ...
एक तऽ करेला, दूसरे निमिया चढ़ल।
मनवा में बा तोहरी जहर भरल।
अधीर मनवा पर तोहरी लगाम कइसे होई॥
बगिया बवुरी लगइबऽ...
स्रोत :
- पुस्तक : गँउवा के माटी अनमोल (पृष्ठ 34)
- रचनाकार : रामबहादुर ‘अधीर पिण्डवी’
- प्रकाशन : अखिल भारतीय भोजपुरी समाज, गोमतीनगर, लखनऊ
- संस्करण : 2010
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
