(1)

नील चीर मण्डित ओ, सहजहिँ अहाँक नीलम कान्ति

दमन हेतु उठबथि हर ओ, व्रत अहँक अहिंसा-शान्ति

यमुना जल कर्षथि कोपे, अहँ दये नहरिसँ पानि

दुर्योधन-संगी ओ, चलइत अहाँ धर्महिक बानि

ओम्हर मंदिर कादम्बरी, एम्हर कादम्बिनि रस-कूप

कृष्ण-सहोदर ओ छथि, सहजहिँ कृष्णे अहँक स्वरूप

हुनक रेवती प्रिया हन्त! भदवा धरि बारलि एक

आर्द्रां सँ स्वाती धरि अनुगामिनी अहाँक अनेक

छी युग-युगक अहाँ हलधर, ओ छला द्वापरक अन्त

तुलना अहँक कतयसँ पौता, लागल एक 'परन्तु'—

ओ बलराम स्वयं, अहाँक छथि निर्बल केर बल राम

इन्द्र-प्रस्थ धरि हुनक हुकूमति, खेतहु अहाँ गुलाम

(2)

जखन अकाल-ग्रस्त जन, जोतय यज्ञ-वाट, हर लेल

सीता उपजा आनि अपन घर जनक जगमगा देल

काल-अकाल नियमसँ चलबी खेत-खेत हर नित्य

घर-घर अन्नपूर्णा बाँटब धन्य अहँक अछि कृत्य

त्रेता केर हलधर भोगक सङ योग कयल निर्वाह

किन्तु अहँक स्वपनहु न भोगमे हे! योगी हरवाह!

समता अहँक कतयसँ करता जनकपुरक श्रीमान्?

किन्तु विदेह वैह कहबै छथि, माटिक अहाँ किसान!

धरती-सुत! अही क कवितासँ हरित-भरित संसार

गढ़ि आखर दस-पाँच धन्य कवि, कहबी अहाँ गमार!

जे अणु गढ़ि, विध्वस्त करथि जग, धन्य हुनक विज्ञान!

कण-कण आविष्कार जीव-हित अहि क तिरस्कृत ज्ञान!

भूमि-फलक पर दूर क्षितिज धरि शस्यक चित्र महान!

हल-तूली अछि सफल अहँक हे कलाकार! रुचिमान!