परिस्थितिक लुक्कड़ पर

बैसल हम

पीबि रहलहुँ अछि अनुभूतिक गरम-गरम चाह,

कि एकटा करू घोंट झिकझोरी देलक जे ठमकि गेलहुँ

सतह परक भाफक उड़ैत गुब्बारामे देखल

विगड़ितहुँ-विगड़ितहुँ बनै अछि आकृति मानवक

आ गन्ध प्रबैत छै अहंक, ऐश्वर्यक

विश्वक विराट् सत्ता, आकर्षण, संवेदन

आ कतेको ऊँच-नीचकेँ समेटि कऽ जोगौने हो

जे अपन आन्हर परम्पराक गाछीमे।

एहि हेतुये तँ आकृति सभ

तुच्छ अछि, क्षणिक अछि, अपूर्ण अछि;

ब्यर्थ सभ चेष्टा छैक।

पियालीक चारूकात

उठै अछि अन्दर विश्वासक

आशाक मिठौंस छैक

दूधक छानल मोनक सभ वृत्ति छैक,

पीड़ाक पानि जे मोहिना खौलायल अछि,

संबोधक पत्तीसँ मिलल-जुलल जीवनक इच्छा—

चाहकेर रङत छैक।

आ हम नहुँये-नहुँये पीने जाइत छी कि सोमरस।

किन्तु

तृप्ति कहाँ? तृप्ति कहाँ?...