मूड़े क बार झरिंगा गोड़े बेवाइ फाटी,
सरपत क उहै मड़हा अरहर क उहै टाटी।
ऊ जे अँजोर बाँटत बाँटत उछिन्न होइगा,
ओकरे घरे क अँधियर के अहै जौन बाँटी।
तन पर न अहै बस्तर पायन म न तौ पनही,
माथे म परी झुर्री पोपलान गाल देखा।
जारत रकत पसीना बाँटत अँजोर घर घर,
मूठी भरे कि ठठरी कै ई कमाल देखा।
कोठी म केउ के बिजुरी चमकै सदा बहारी,
एनके घर क बाती बस जुगर जुगर जागै।
अधरम कि कमाई से ओ राजभोग भोगैं,
एनके बरे न सूखी रोटिउ क जोग लागै।
स्रोत :
- पुस्तक : माटी औ महतारी (पृष्ठ 19)
- रचनाकार : आद्या प्रसाद 'उन्मत्त'
- प्रकाशन : अवधी अकादमी
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
