अपना घरक सपना
apna gharak sapna
बौआक बाबूक आँखिक
सपना बनल अछि
एकटा घर/अपन घर
जकर हवा अपन हो
सूर्यक रोशनीक संग
चन्द्रमाक हँसी अपन हो
जकर भीत आ चार
अपना हेबाक सहारा दिअय हरदम
समयक तेज तूफान मे
जकर नियों भसिया नहि जाय कहियो
घर खाली करबाक
मकान मालिकक/तेज तलवार नहि हो माथ पर
एडवांस जमा करैक लेल
चिन्ताक चानन नहि हो कपार पर
एहन एकटा घर हो/अपन घर
मुदा आँटा चाउरक दाम
स्कूलक फीस/बिजलीक बिल
मकानक किराया/जोड़िते-जोड़िते हुनकर बजट
गड़बड़ा जाइत छनि सब बेर
ओ सोचैत छथि सब बेर
एहि बेर किछु बचायब
मुदा वर्त्तमान/भविष्यक परवाहि कहाँ करैत अछि
पछरि जाइत छथि सब दिन
रुपैया-रुपैयाक हिसाब
बराबर भऽ जाइत अछि सब बेर
सब बेर ओ अपना पेन्ट शर्टक मादे सोचैत छथि
मायक साड़ी लेल औनाइत छथि
बाबूक तमाकुलोक खर्चा
भारी बुझना जाइत छनि
बेटाक नवका जूता लेल
पाइ नहि बचा पबैत छथि
हमर इच्छा आ आकांक्षा तऽ कोनो अर्थे नहि रखैत अछि
मोन पड़ैत अछि/बच्चा मे बनबैत रही
माटिक घेरावला घर
ओहि घर मे
एकटा भनसा घर रहय
तकर सटले रहय भगवतीक घर
ओहने एकटा घर हुअय
जाहि मे खपटा-खुपटी खेलाइ
साँझ कोबर सँ लऽ कऽ
पराती भजन तक गाबी
आ भोर होइत देखी जे
घर तहस-नहस भेल अछि
कत्तौ नहि बाँचल अछि अवशेष
अपना घरक
डर लगैत अछि—
हेरा नहि जाय कहियो एहिना
रातिक अन्हार में देखल
दिनक इजोत मे
अपना घरक सपना
एकदिन
- पुस्तक : समयसँ संवाद करैत (पृष्ठ 1)
- रचनाकार : कामिनी
- प्रकाशन : स्मृति प्रिंटर्स एण्ड पब्लिशर्स
- संस्करण : 2008
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
