पुरवइया धीरे बहऽ
puraviya dhire bahऽ
मनवा के मीत छुटल जा रहल
पुरवइया धीरे बहऽ!
जब से बुता के सनेहिया के बाती
भइलन पराया संगे के संघाती
निनियो के पाँख फुटल जा रहल
पुरवइया धीरे बहऽ!
निसबद में गछिया ले जाके एकोरा
अँजुरी से फेंके बरफ के अंगोरा
सुधिया के साँस घुटल जा रहल
पुरवइया धीरे बहऽ!
पनिया के कतनो पपनिया से रोकीं
आँखिया तर तोपीं, असरवा से सोखीं
धिरजा के बाँध टुटल जा रहल
पुरवइया धीरे बहऽ!
तोहरा पता का जे सब से चोरा के
अइलीं जोगावत अपन सब ओरा के
थाती ऊ आज लुटल जा रहल
पुरवइया धीरे बहऽ!
स्रोत :
- पुस्तक : सुर में सब सुर (पृष्ठ 19)
- रचनाकार : तैयब हुसैन पीड़ित
- प्रकाशन : शब्द संसार, पटना
- संस्करण : 2011
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
