किछु सम्बन्ध भ' जाइछ

जिनगीक नहसूर

जँ गड़ि जाय मोनमे

अहं आ कि अविश्वासक खैंक

आ

नहि निकालल जाय ओकरा

समय अछैत

भ' जाइछ

संवादहीनताक पकोहि

भरि जाइत अछि

अवसाद, इर्खा, अविवेक आ घृणाक पीज

जँ नहि हो इलाज एकर

धैरज, विवेक आ सिनेहक औखधिसँ

कएक बेर

अबडेरि देल जाइछ

उचित संवादक मलहम-पट्टीकेँ

आ

भ' जाइत अछि ई मारुक

संक्रमित करए लगैत अछि

जिनगीक देहकेँ

एहिसँ पहिने कि

होमय लागय संक्रमित आनो सम्बन्ध

आ कि

मरय लागय जिनगीक सभ सपना

मोनक जिजीविषा एहि संक्रमणसँ

कोनो बेजाय नहि जे भ' जाइ बरू फराक

ओहि संक्रमित सम्बन्धसँ

जेना कि काटि देबए पड़ैछ

असाध्य कैंसरसँ संक्रमित अंग कोनो

देहसँ ककरो

जिउबाक आसमे

आखिर

एकटा सम्बन्धक कीमत पर

कोना मारल जा सकैछ

जिनगीक सभटा सम्बन्ध आ सपना!