ई आँख

रहैत अछि सदिखन सपनायल सन

दिन हो वा राति

देखैत अछि सपना

नेहसँ बान्हल परिवारक

सुख-शान्तिसँ भरल घरक

सिनेहसँ जुड़ल दर-दियादक

प्रेम आ विश्वाससँ गछारल गामक

अप्पनक सुख लेल

संसार छोड़बाक सपना

त' संसारक सुख लेल

अपनहुँकेँ त्यागक सपना

देखैत अछि ई आँखि

ई आँखि भरल उछाहसँ

जाहिखन रहैत अछि

हीत-मीत, सर-समाजक बीच

ई आँखि ग’जल सिनेहसँ

जाहिखन रहैत अछि

सर-कुटुम्ब, सर-समांगक संग

ई आँखि जरल अंगोरसँ

जँ देखल कत्तहु

पाखंड, अनीति आ अन्याय

ई आँखि सजल नोरसँ

जँ होइछ कत्तहु

बेबस, बेकल आ अनुपाय

ई आँखि

संजोगैत अछि पियास

एकटा सपना पुरलाक बाद

नव-नव सपना देखबालेल

ई आँख

संजोगैत अछि आस

एकटा सपना टुटलाक बाद

विपरीत समयसँ लड़बा लेल

औ मीत!

जँ बुझ' चाही हमरा

त' देखू नहि हमर

घर-घरारी, कपड़ा-लत्ता, जुत्ता-छत्ता

आइद-ओकाइद आ कि जर-जथा

बरू देखू एहि

छोट आँखिक पैघ-पैघ सपना

ओकरा साँच करबाक निस्सन जिद्द

आँखिक अन्तिम उजास तक

आ पैरुखक अन्तिम साँस तक

आ कि

तकरा बादो चाहब हम

जे भेटै ई आँखि

कोनो ज्यातिहीन सपनजीबीकेँ

जें कि देखय

ई आँखि

नव-नव सपना

आ

इएह थिक अन्तिम साँच

एहि सपना देखैत आँखिक।