गोतियारो
gotiyaro
हम त नाहिंए लिहतीं दहेज
कइए दिहतीं बबुआ के मुफुते में मरेज
बाकी का करीं, का कहीं
हइ जपखेया गोतिया बदमास—भिखार ह, भिखार
अपना सतवाँ फेल पूता प
गिनवा लेलस सात हजार
त अब रउए कहीं, अपने से सोच-बिचार
कि अपना अठवाँ फेल ललना प
ना जे लीहीं आठ हजार
त हँस-हँस भरी कि ना गाँव-जवार
कि बुला खोंखड़ हो गइल
फलनवा सिंघ के परिवार
थोरहीं दिन में बोलबइन
पिछुत्ती के खेत में हुँडार
भला बेटा के, बिना दहेजे के, गरजे जे कइले बियाह
त बेटी में त, मुँहे दाँत दीहें चिहार!
से सुनीं, तनी बात बूझीं
आठे हजार दीहीं
बाकी गाँव-घर से दस-बीस हजार कहीं
अब हीत नाता भइनी हमार रउआ
राउर ईजत हम ना बूझब
हमार रावा ना बूझब
त के बूझी?—बँड़ेरी प के कउआ?!
- पुस्तक : बेटी मरे त मरे कुँआर [भोजपुरी कविता-संग्रह] (पृष्ठ 26)
- रचनाकार : प्रकाश उदय
- प्रकाशन : कौशल्या प्रकाशन, आरा
- संस्करण : 1988
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
