भ्रष्टाचार कि जय ब्वालउ

जगजीवन मिश्र ‘जीवन’

Roman

देखेउ केत्ता चलि पाई वह अन्ना की छुक छुक गाड़ी

भ्रष्टाचार कि जय ब्वालव अब दे ताड़ी भाइ दे ताड़ी

अमरमणी का ना ख्वाजउ तुम अउ मधुमणि मा ना खोएउ

बन्धु बनइ के मउका मा जब होएउ तब रेड्डी होएउ

बाकी राह बतइब करिहइँ कनिमोझी अउ कलमाड़ी

भ्रष्टाचार कि जय ब्वालउ अब दे ताड़ी भाइ दे ताड़ी

चारा खादि यूरिया खाइनि यान हवाई खाइ गए

हजम न कइसे हुइ पावइ कुन्टलन दवाई खाइ गए

सी बी आई ने भी केवल फटी फटाई ही फाड़ी

भ्रष्टाचार कि जय ब्वालउ अब दे ताड़ी भाइ दे ताड़ी

वोट नोट के चक्कर मा कुछु अमर भए कुछु मुरदे हैं

जिनके नाउँ न आइ सके वइ सब सरकारी गुरदे हैं

जिनकी दम पर बड़ी बिल्यावा अपने पंजे पर ठाढ़ी

भ्रष्टाचार कि जय ब्वालउ अब दे ताड़ी भाइ दे ताड़ी

रहु-रहु बसु-बसु करति-करति यदुरप्पा का बजिगा बाजा

चका चौंध मा परिके हमका भूलि न जाएउ ए राजा

चुप हुइगेन जब रामदेव जी हुइगे कुरता सलवारी

भ्रष्टाचार कि जय ब्वालउ अब दे ताड़ी भाइ दे ताड़ी

कीमति हइ कम इन्सानन की सैन्डिल के रुतबा जागे

कुछु ताने हइँ पीछे ते कुछु प्वाँछति हइँ आगे आगे

टकहउ घूमइ रोब दिखावति जलवा काटइँ सरकारी

भ्रष्टाचार कि जय ब्वालउ अब दे ताड़ी भाइ दे ताड़ी

काटि रहे जनता का हइँ यइ मनमा बड़े सयाने हइँ

समय परे पर देखे हन बकरी जइसन मिमियाने हइँ

नसा चूर हुइहै सगरो जब खोपड़िप हुई हइ बमबारी

भ्रष्टाचार कि जय ब्वालउ अब दे ताड़ी भाइ दे ताड़ी

dekheu ketta chali pai wo anna ki chhuk chhuk gaDi

bhrashtachar ki jay bvalav ab de taDi bhai de taDi

amaramni ka na khvajau tum au madhumani ma na khoeu

bandhu banai ke mauka ma jab hoeu tab reDDi hoeu

baki raah batib karihain kanimojhi au kalmaDi