आन्हर छथि भगवान, कहओ के?

आजुक युगमे भौतिकवादक, फूसि-फटक अभिमान, कहओ के?

पाथरमे ओ बास करै छथि,

आ हमरे उपहास करै छथि,

हमरेसँ पुजबै छथि आ हमरेपर 'शेखी-शान', कहओ के?

सुन्दरता लय पुरुष फटै छथि,

नारी वर्गक नाक कटै छथि,

तेँ तँ महिला सब उठि चलली, काटय पुरुषक कान, कहओ के?

ओ लड़ती आ भिड़ती जा कऽ,

सभा-मंचपर अड़ती जा कऽ,

पुरुष-समाजक बीच झाड़ती, बड़काटा व्याख्यान, कहओ के?

पुरुषक हेतु अनारी नारी,

पुरुषे नारी हेतु अनारी,

फूसि घोँघाउजिमे दुनू दल, होइ छथि व्यर्थ हरान, कहओ के?

प्रकृति-पुरुष दूनू समान अछि,

ने ई न्यून, न ओ महान अछि,

युग-चक्रक चक्करपर नाचल, निश्चित अनुसन्धान कहओ के?

पेटक अछि लागल लपेट जा,

मुँहपर अछि लागल चपेट ता,

ककर माय ओ बाप ककर, वा होइत छै सन्तान, कहओ के?

सभक उखाही सब करैत अछि,

अपनेटा लय जग मरैत अछि,

आनक लेखेँ आन बनल अछि, आलू सड़ल-पुरान, कहओ के?

अपना लग संसार ढीठ अछि,

आँखिक लेखेँ पाछु पीठ अछि,

सभक जनै छै सब तैओ, अनके लय सब बैमान, कहओ के?

एकर विवेचन के करैत अछि,

जे 'करैत’ ¹ अछि से करैत अछि,

हमरो सन बुड़िवान बुझै अछि, अपनाकेँ विद्वान, कहओ के?

सब अलच्छ अवतार लेलक अछि,

रुच्छ-छुच्छ संसार देलक अछि,

अपन बेगर्त्ते युग अछि आन्हर, परतच्छक परमान, कहओ के?