आवा बसंतु आवा बसंतु।
टेसुन मा आगी बरै लागि;
लखि भीर भौंर की जुरै लागि;
हँसि परी प्रकृति पाटम्बर सजि
क्वैली कू-कू सुर भरै लागि:
जाड़ा-पाला का भवा अंतु।
आवा बसंतु आवा बसंतु।
छिति पर छबि छहरी हरी-भरी
चिरई सब मिलि गावति निकरी;
चातक की कौनु कहै भइया,
रट पी-पी की जनु बाट परी;
बनिके आवा सबका महंतु।
आवा बसंतु, आवा बसंतु।
फुलवा फूलैं बन ऊलि-ऊलि;
कोमल डारन पर झूलि-झूलि
दिनु छिनु छिनु बाढ़ै, हड़ै घामु
बरग्यलिया ल्वाटै धूलि-धूलि
पियराइ उठा सब दिग-दिगंतु।
आवा बसंतु, आवा बसंतु।
1958 ई.
स्रोत :
- पुस्तक : अरघान (पृष्ठ 38)
- रचनाकार : सत्यधर शुक्ल
- प्रकाशन : पं. वंशीधर शुक्ल स्मारक एवं साहित्य प्रकाशन समिति, मन्यौरा, लखीमपुर खीरी
- संस्करण : 2021
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
