छोडू विद्यापति आब शिवसिंहक धाम
आउ बसु, आब हमर गाम
देखू एतौका समाजकेँ
बहुत दिन धरि गेल राधाक नख-शिखपर दृष्टि
आ केलियैक कृष्णक चल-चितवनक सृष्टि
किंवा राजाक नगर अट्टालिका प्रासादक वर्णन
आब लिखू हमर गामक खिस्सा
सत्ते गप्प!
कोना मरलै मंगली
दहेज कारणें फँसरी लगाकेँ
आ कोना मरल हमर प्रिय दोस खालिद
हिन्दु-मुसलमान केर दंगामे
कोना जरैत रहल
सबहक खोपड़ि
आ लहासकेँ कन्हा दय बला केओ नहि
नहि तँ कमसँ कम
हे नवका विद्यापति
अहीँ लिखू श्रम-संघर्षक कथा
आ सुनू तान धनरोपनीक
वा धनकटनीमे कचियाक सनसन स्वर
आ गिट्टी फोड़ैत जनानी केर
हथौड़ीक टंकार
पनभरनीक कोकिल कंठी-तान
वा कोसीक कछार परका बाढ़िमे
भासल जिनगीक गाथा
डुबैत शहर आ गाम एक्के संग
लिखू विद्यापति!
घिनायल-मिनायल, लूल्ह नांगरक कथा
आउ विद्यापति!
यैह लिखऽ लेल
हमर गाममे अपनेक स्वागत अछि
- पुस्तक : एतबे टा नहि (पृष्ठ 46)
- रचनाकार : अरुणाभ सौरभ
- प्रकाशन : नवारम्भ
- संस्करण : 2017
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
