हमरे दुअरवा रे निमियाँ के गंछिया
डारिन चिरइया बसेर रे,
ताही तरे बाबा हो सोवें करनिनियाँ
बिटिया बिअहवा के फेर रे।
संझिया के होते सब उड़ली चिरइया
सुति गइलें गँउवाँ के लोग रे,
एगो नाहीं सूतेलनि भइया वीरन भइया
बहिनी बिअहवा क फेर रे।
घिरि अइली सगरों रयन अन्हियरिया
रतिया भइलि घनघोर रे,
चाचा के कतहीं ना सूझेला रहिया
लगलें दहेजवा के फेर रे।
माई बइठि सोचे घर के ओसरिया
कवनों ना लागे उतजोग रे,
कवन सुन्नर वर सेनुरा बहोरिहे
कवने नक्षत्र लागे देर रे।
स्रोत :
- पुस्तक : लोक रागिनी (पृष्ठ 190)
- रचनाकार : भोलानाथ गहमरी
- प्रकाशन : रागिनी प्रकाशन, गाजीपुर
- संस्करण : 1995
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
