देवी मैया
देवी मैया!
दऽ सकै छी तँ दिय जवाब
होइ छै कियै
सब दिन
खाली मौगिये डाइन
आ मनसा भगता?
देवी मैया!
अहीँ सन मौगी
समेटै छै अपनामे
सिर्जनाक बून्द
आ, सिरजै छै
मनसो आ मौगियो,
देवी मैया!
दऽ सकै छी तँ दिय जवाब
मौगिये सन अहाँ
पूजल जाइ छी
आ अहीँ सन मौगीकेँ
कहल जाइ छै कियै डाइन?
पिआयल जाइ छै गूँह-मूत,
देल जाइ छै
वर्वर सामूहिक हत्याक दण्ड
आ बेर-बेर दैत रहैत अछि
सलामी,
रखैत अछि साक्षी
अहीँक, मनसा।
देवी मैया!
अहाँकेँ याद अछि
नचबैत तरुआरि
आ बरका-बरका मोंछबला
मुण्डमाल पहिरने अपन चित्र।
देवी मैया!
की अहाँकेँ बूझल अइ
मनसा, अहाँक ओ चित्र
रखने अछि जोगाकऽ
मुदा जीवन बिना,
आ बन्न कऽ देने अछि
एकटा कोठरीमे वा गहबरमे
बना कऽ काठ-पाथर
आ माटिक थुम्हा।
देवी मैया!
कि अहाँकेँ लगैये नीक
सालमे एक बेर पुजाइत
आ भरि साल
दण्ड भोगैत रहब मौगी होबऽकेँ
बेटी-पत्नी आ मायक रुपमे।
देवी मैया!
कहि सकै छी तँ कहू
एकटा मौगीक रुपमे
कहियो रहि सकैत छी अहाँ
स्वतन्त्र?
देवी मैया!
धूप, धुम्मन आ गुगुलक
आँखि-कान आ नाकमे घुसियाइत
तिक्ख धूँआँक बीच
मूड़ी झँटैत
करताल भँजैत
भगता सबकेँ मन्तरसँ
मनसायल
मरनी आ मलेछिया
कहियाधरि ढोइत रहत
मौगी होबाक पीडा?
मुदा, देवी मैया!
बूझल अछि हमरा
मायक रुपमे
आ शक्तिक रुपमे
स्थापित कऽ कऽ
कऽ लेने अछि कैद
अहाँकेँ,
आ कऽ लेने अछि कब्जा
अहाँक सभ शक्ति।
आ बूझल अछि इहो
मौगी,
होयत नहि जाधरि लैस
ज्ञान आ संघर्षक हथियारसँ
ने तँ अपने स्वतन्त्र होयत
ने अहाँ।
- पुस्तक : समय गीत (पृष्ठ 65)
- रचनाकार : रोशन जनकपुरी
- प्रकाशन : मैथिली विकास कोष, जनकपुर
- संस्करण : 2013
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
