औ जी

एकटा प्रश्न पुछू

पुछबासँ पहिने पूछि लेलहुँ

कारण जे आइ-काल्हि

प्रश्न पूछ' पर सेहो

उठि रहल अछि प्रश्न

आ जँ तैयो पुछिए लेल अहाँ

त' रहब तैयार

जे उत्तरमे दागल जा सकैछ प्रतिप्रश्न

ओना की कहैत छी

जँ पूछल नहि जाय

त' प्रश्न की रहत नहि

ई प्रश्न त' प्रश्न बनि रहबे करत ठाढ़

से जँ मुँह नहि त' पूछत आँखि

जँ शब्द नहि त' पूछत भाव

आ जँ लोक नहि

तखन आत्मा त' पुछबे ने करत प्रश्न

तेँ त' मोन कहलक

पुछिए ली अहींसँ जे

की बिनु प्रश्ने

जतय पहुँचल अहाँ

से होइत सम्भव कहियो

नहि ने

त' फेरि आइ किएक भ' गेल अछि

प्रश्न पूछब अक्षम्य अपराध?