मुइल जीवन
muil jivan
पड़ाइत छी, पड़ायल चल जाइत छी
हमरालोकनि अपना लेल अपनासँ,
अपन परिवार, घर-आङन, गाम-नगर,
अपम देश कोशसँ पड़ायल चल जाइत छी हमरालोकनि।
हमरालोकनि बेचि लैत छी एक चुटकी नोनक खातिर
जीर-मरीच-धनी, मरिचाइक बराबरि,
सागक दोबर, भाँटाक डेढ़िया,
बेचि लैत छी अपन अस्तित्वकेँ अपना लेल;
आ, गरदनिमे दसटा पजेबा, डाँरमे मनुख भरिक उक्खड़ि,
पयरमे मोन-दस मोनक बटिखारा बान्हि,
हाथमे हथकड़ी, जिह्वापर काँटी, जाबी लगाकऽ मुँहपर;
अतल जल-राशिमे कूदिकऽ पड़ा जाइत छी।
पड़ा जाइत छी हमरालोकनि अपनासँ
आ, अपनहिमे बौआइत छी—गामक हाट आ नगरक बाजारमे
करैत छी चीत्कार जन-कल्लोलक तरंगमे,
तकैत छी अपन आकृति
मिलक चिमनीमे, चकचौन्हीमे फूटल आँखियेँ,
पीबिकऽ भरि बोतल।
आ देखैत छी इनार-पोखरिमे डुबैत युवतीकेँ
अपन सखी-बहिनपासँ चोराकऽ,
पड़ाइत युवककेँ गामसँ पटना आ कलकत्ता।
भा, पड़ाइत छी, पड़ायल चल जाइत छी हमरालोकनि
ठाढ़ भेल जीबा लेल
आ, जीबैत छी हमरालोकनि मुइल
मुइल आ, मरैत छी जीविते।
- पुस्तक : मैथिलीक नव कविता (पृष्ठ 75)
- संपादक : रामकृष्ण झा ‘किसुन’
- रचनाकार : हंसराज
- प्रकाशन : सांस्कृतिक विभाग, सुपौल, बिहार
- संस्करण : 1971
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
