अरुण किरण-रेखासँ जागल जग-मग नवल प्रभात

सिहकय लागल नहु-नहु खेलइत संगी सुखद बसात

हँसइत फूल द्वारिपर झुलइत नचइत सरिता-कूल

जल-तरंगपर चकमक करइत, पथपर कण-कण धूल

कोर बैसि सूनल हम प्रथमे गुन-गुन स्वर्गिक गान।

मायक ममतामे कविता की करइत अछि आह्वान?1॥

सहजहिं मलय-समीर आबि पुलकित कयलक उद्यान

कुसुमित कली-कलीक सुरभिवश चञ्चरीक चित प्राण

आमक शाखा आलिङ्गित कय कुहकय कोकिल-कीर

नव वसन्त यौवनसँ मातल जड़-जंगमहु अधीर

नख-शिख कुसुमित लता-कुञ्जमे बैसलि प्रणय-विभोर

प्रेयसीक नयनक संकेते कविता करइछ सोर॥2॥

भीजल थल आर्द्राक, आर्द्र लोचन-जलदे बहि नोर

हिम भेल द्रवित, नदीक व्यथासँ भरि अयले दृग कोर

परदेशीक प्रेयसी उन्मन दूर जकर चित-चोर

आँखिक मोतीसँ दिन गनइत रजनी कयलक भोर

सूचित करइत पहुक आगमन, पाँती पतिक पठाय

आशा-बँधबय 'धीरज धरु धनि' कविता सखी सुनाय॥3॥

घर-घर गौरी करथि तपस्या पूजि तुषारी प्रात

वर वौराह उमाक देखिके होइछ उर आघात

मुदित किन्तु हिमवन्त विकल-मन मैना स्नेहक स्रोत

जनमि जनक-जननीक मैथिली घर-घर करथि इजोत

शकुन्तला आश्रमकेर शोभा पति-गृह आबि विभोर।

कण्व गौतमीके कनबथि, कविता पोछथि दृग-नोर॥4॥

कुञ्ज-पुञ्जसँ कोलाहल सुनि जन-पथ देखि समक्ष

हर-कोदारि-खुरपीक पुजारी अर्ध-गंग्न कत लक्ष

क्षुधित पिपासित रक्त शुष्क कय जोति कोड़ि जी दाबि

सुजला सुफला जनिक कठिन श्रम गीत वन्दना गाबि

कृषक श्रमिक केर श्रमजल चुबइत पावन गंगा-नीर।

साग-भात लय ठाढ़ि खेतमे कविता कमला तीर॥5॥

पति परलोक बसल, घर उजड़ल, चिन्तित चित्त अधीर

मास-माससँ जकर कमासुत सुत ज्वर-गलित शरीर

जकर अन्नपूर्णा भसिऐले कौशिकीक मझधार

जीवन-तटपर एक शब्द सुनइछ जे हाहाकार

ओहि अनाथ विधवाक अश्रुहिक समरो उमड़ल बाढ़ि।

करुण क्रन्दने कविता कनइछ कौशिकीक तट ठाढ़ि॥6॥

रस-तीतल बीतल वय, सहसा कटु जीवन-संघर्ष

छोड़ि फूल, मूलक अन्वेषणमे बूझल उत्कर्ष

छाया छोड़ि, मुक्त आतपमे जीवन ई गति-शील

नीचाँ धरती माता, ऊपर निर्मल-अम्बर नील

परवंशताक पाश कटइत जीवन बंदीक अधीर।

बलिदानक शूलीपर झुलइत कविता गाबय गीत॥7॥

पूर्वाञ्चलसँ सुन्दर वनक विहंगम उड़ि-उड़ि आबि

सिन्धु-संगिनी राबी कनइछ खण्डित रसना दाबि

उदित भानु रजनी-तम चिरइत नव-नव लय आलोक

किन्तु हमर अछि रूप विरूपित, हर्षहु बोरल नोर

एखनहु धर बिस्पी-आङनमे मिथिला बहबय नोर।

कविता मिलित कण्ठसँ गबइछ 'हमर दुखक नहि ओर॥8॥