रोज रातिमे अहाँकेँ केओ सोर करैए

सिनेमाक अंतिम शो खत्म भेलाक बाद

जखन लोकबेद घरमुँहाँ बरद जकाँ घूरि जाइत अछि

अपन-अपन ठेकानपर

सोसायटीक चौकीदार

एक बेर आर अपन सीटी बजाकऽ

पहाड़क स्मृतिमे डूबल जखन

बिला जाइत अछि एक टा प्रदत्त अन्हारमे

जखन रातिक परती खेतकेँ

अपन सहस्र फारसँ चीरैत-फाड़ैत पड़ा जाइत अछि

हकासल-पियासल एकबजिया ट्रेन

बहुत दूरसँ अहाँक नाम लऽकऽ

केओ सोर करैए

अहाँ गाढ़ नीन्दमे रहै छी मातल

कि हठात भीजि जाइत अछि सगर देह

आ भालरि जकाँ काँपऽ लगैत अछि अहाँक प्राण

अहाँ उठि कऽ बैसै छी

जल पीबै छी

आ जहिना करट बदलि कऽ कोनो आन ठाम

लगबऽ चाहै छी अपन ध्यान

कि एक टा करुण-कातर आवाज सूनि कऽ

फेर ठाढ़ भऽ जाइत अछि अहाँक कान

अहाँ सुतै छी आ उठै छी

उठै छी आ सुतै छी

सुतैत-उठैत अपन अनिद्राक मरुथलकेँ

एक टा बूढ़ जर्जर ऊँट जकाँ कहुना पार करै छी

राति भरि जपैत भगवानक नाम

मुदा एक टा अनुत्तरित गाम

बेर-बेर अपन नाम आ अपन ठाम बदलि कऽ

बहुत दूरसँ अहाँकेँ सोर करैए

•••

अहाँकेँ सोर करैए

बिढ़नीक छत्ताक उपरमे लटकल एक टा डमहा लताम

गुनेसर साहक दुआरपर ठाढ़ तेतरिक गाछ

आ खलीफाक आड़ाक सिनुरिआ आम

अहाकेँ सोर करैए

एक टा टुटलहा स्कूल

धूरापर खसल जेना सुखलहा फूल

अहाँकेँ सोर करैए

चूबैत घर आ नोनियाँ लागल देबाल

बाट तकैत खड़ाम आ फोटोमे लागल मकराक जाल

अहाँकेँ सोर करैए गाछ-पात लोकबेद आँगन आ दुआर

एक आँगुर धँसल आँखि कि टूटल केबाड़?

अहाँकेँ सोर करैए अहीँसँ छूटल

अहाँक अभिशप्त अंश

खाइत-पिबैत सुतैत-उठैत वैह मारैत अछि दंश

अइ दुनियामे माँगै छै सभ चीज अपन-अपन हिसाब

ओ पाँच घंटाक बाद माँगय कि पचास बर्खक बाद