नमहर हो चद्दरि जतबए
लोभे लोभबय लोक कँ, संवरणहु ने शेष
एकर फेर मे जे पड़य, संकट सदा अशेष।
लोभे क्षोभक वरण हो, जै सँ बढ़ै उताप
कारक नाशक ई बनय, लोभे जड़ि थिक पाप।
असंतोष थिक मूल जे, मरबा दैछ बिचार
सोनक कंगन लोभवश, पथिक बाघ आहार।
कनक हरिन के चाह, जे, नहिं भेटय ब्रह्मांड
सीता-हर कारण बनल, भs गेल लंकाकांड।
अधिक लोभके कारणँ, काँकोड़ गिड़लक बक
प्राणहु संकट मे पड़ल, चलल कोनो अकबक?
अगम पानि के लोभ मे, माछ लगैछ उजाहि
फँसि टहुकी रहि जाइ छै, काटय लागइ काहि।
जे किछु भेटल ईश सँ, ओही मे संतुष्ट
अहगर पएबाक आस मे, मोन होइ नै रुष्ट।
संतोखे थिक सुख परम, अधिलोभक ने आस
नमहर हो चद्दरि जते, ततबए मे हो बास।
- पुस्तक : नमहर हो चद्दरि जटबए (पृष्ठ 13)
- रचनाकार : अमरनाथ झा ‘अमर’
- प्रकाशन : अनुप्रास प्रकाशन
- संस्करण : 2021
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
