रूपरसिक मोहन मनोज मन-हरन सकल गुन-गरबीले।
छैलछबीले, चपल लोचन-चकोर चित्त-चटकीले॥
रतन-जटित सिर मुकुट लटक रहि, सिमट स्याम लट घुंघरारी।
बालबिहारी, कन्हैयालाल, चतुर तेरी बलिहारी॥
लोलक मोती काम कपोलनि झलक बनी निर्मल प्यारी।
जोति उज्यारी, हमैं हरबार दरस दै गिरिधारी॥
बिज्जु-घटासी दंत छटा मुख देखि सरद-ससि सरमीले।
छैलछबीले, चपल लोचन-चकोर चित्त-चटकीले॥
झँगुली झीन जरीपट कछनी, स्यामल गात सुहात भले।
चाल निराली, चरन कोमल पंकज के पात भले॥
पग-नूपुर-झनकार, परम उत्तम जसुमति के तात भले।
संग सखन के, निकट जमुन-तट गोबछरान चरात भले॥
ब्रजजुवतिन के प्रेम-भोग में घर-घर माखन-गटकीले।
छैलछबीले, चपल लोचन-चकोर चित्त-चटकीले॥
गावैं बागबिलास, चरित हरि सरद-रैन रसरास करैं।
मुनिजन मोहैं, कृष्ण-कंसादिक-खल-दल नास करैं॥
गिरिधारी महाराज सदा श्रीब्रज बृंदावन-वास करैं।
हरि-चरित्र को, स्रवन सुनि-सुनि करि मन अभिलाष करैं॥
हाथ जोरकै करैं बीनती 'नारायण' दिल-दरदीले।
छैलछबीले, चपल लोचन-चकोर चित्त-चटकीले॥
- पुस्तक : ब्रजमाधुरी सार (पृष्ठ 264)
- संपादक : वियोगी हरि
- रचनाकार : नारायणस्वामी
- प्रकाशन : हिंदी साहित्य सम्मेलन, प्रयाग
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
